|
info@firstclasseg.net

التصميمات الداخلية

99 نصيحة قبل ماتشطب شقتك

by admin |نوفمبر 18, 2020 |0 Comments | التصميمات الداخلية

1. حاول تخطط لكل تفصيله قبل ماتبدأ شغل.
2. ارسم فرش افتراضي للشقة عشان تقدر تحدد أماكن مخارج الكهربا و السباكة صح.
3. المطبخ من أهم الفراغات في الشقة بلاش تضيق مساحته عشان توسع الريسبشن.
4. حاول توسع المطبخ على قد ماتقدر.
5. اعمل حسابك تجيب ترابيزة أكل صغيرة في المطبخ دي أهم من ترابيزة السفرة.
6. اهتم بالليفينج أكتر من الريسيبشن.
7. مش لازم تجيب بوفيه و نيش.. الجزامة أهم.
8. الدييب فريزر و المايكروويف أساسيات أكتر من الصيني اللي ماحدش بيستخدمه.
9. لو شقتك ضيقه ماتعملش حمام ضيوف عشان الضيوف اللي مش بييجوا غير مرة في السنة.
10. البورسلين قطع الليزر في مصر أثبت فشله.. هات سيراميك نوع كويس أفضل.
11. سيراميك الجوهرة أفضل من كليوباترا بمراحل.
12. لو معاك فلوس و هاتجيب بورسلين يبقى تختار نوع محترم و فرز أول و يتركب صح بمادة لزق مش بمونة.
13. لو ما اخترتش البورسلين صح و ركبته صح هيفك من الأرض بعد سنتين.
14. لو حابب تدلع شقتك ركب hdf في الغرف.. هتنبسط.
15. لو مش حابب تدلع شقتك على الأقل ركب hdf في غرفة النوم.. صدقني هتنبسط.
16. لو شقتك مجروحة من الجيران ماتنساش الستاير البلاك أوت.
17. البراقع و البلتكنات اللي حماتك هتختارها دي بطلت من 15 سنة.
18. الدهانات السبونج مش أحلى حاجة في الدنيا.
19. ورق الحائط الـ 3d هايل بس ماتكترش منه.
20. أكتر 3 حاجات عاوزك تهتم بيها هي تأسيس السباكة و تأسيس الكهرباء و العزل.
21. الشبابيك الألومينيوم عملية أكتر من الشبابيك الخشب.
22. لو هتركب شبابيك ألومينيوم إختار أي قطاع غير قطاع السعد.
23. الألومينيوم بيتدهن ألوان كتير غير البيج و الأوف وايت على فكرة.
24. لو معاك فلوس ركب شاتر على الشبابيك الألومينيوم.
25. غرفة النوم الرئيسية ركب للشباك بتاعها زجاج دبل.
26. عدي النقطة اللي فاتت و مش لازم تعرف السبب.
27. حاول في شقتك تكتر من إستخدام الخامات الطبيعية و تقلل الخامات الصناعية بتفرق كتير في الإحساس بالراحة.
28. الشبابيك الجرار بتساعد على سهولة الفرش و لكن بتقلل الإضاءة و التهوية.
29. الشبابيك المفصلية بتزود الإضاءة و التهوية بس هتصعب عليك الفرش.
30. لو شقتك واسعة اعمل شبابيك مفصلي و لو ضيقة اعمل الشبابيك جرار.
31. الشبابيك الـ pvc جميلة و بتعيش.
32. لو شقتك في منطقة مقطوعة ركب كاميرات خارجية مابتتكلفش كتير على فكرة.
33. ماتجيبش نيش.
34. معابر الأبواب مهمة عشان بتمنع الصوت و الضوء و الحشرات.
35. إختار أبواب خشب كويسة عشان ماتندمش و باب الشقة هاته باب مصفح لو معاك فلوس.
36. خلي النجار يركبلك جوانات كاوتش لكل الأبواب عشان بتمنع التراب و الصوت.
37. كل الشبابيك احقن حواليها فوم من الخارج و سليكون من الداخل عشان الحرارة و الصوت و التراب.
38. الجيبسوم بورد بيتعمل بيه حاجات كتير غير الأسقف على فكرة.
39. الجيبسوم بورد حاجة أساسية بس تستخدمه صح لما تحتاجه.
40. أكتر حاجة هتخلي شقتك شيك هي توزيع الإضاءة صح.. خلي حد مخصص يوزعلك الإضاءة.
41. اهتم إنك تشتري شفاط محترم للمطبخ.
42. الشفاط اللي بيركب فوق البوتاجاز شكله حلو و شيك و بس.
43. ماتركبش في الأرضيات السيراميك المستطيل اللي شبه الباركية عشان بيقوس و بيجير.
44. لو عاجبك السيراميك اللي شبه الباركية ركب hdf هتتبسط صدقني.
45. اعمل حساب كل تفصيله في تأسيس الكهرباء و ماتنساش الدش و التليفزيون و التليفون و النت.
46. اعمل حسابك لتأسيس التكييف حتى لو مش هتشتري تكيييف.
47. بلاش دهانات مط و بلاش دهانات لامع.. النص لمعة أو الربع لمعة أشيك بكتير.
48. آخر صيحة في الديكورات حالياً هي الأسقف السترتش اللامعة.
49. لو عاوز تدلع مكان معين في شقتك ممكن تعمل ديكورات بـ CNC .
50. اختار كل حاجة قبل ماتبدأ تنفيذ أي حاجة.. دي قاعدة أساسية.
51. أسس اسكيب و شطب جوتن.. ده في الدهانات.
52. مافيش أشيك ولا أرقى من الدهانات السادة بس تختار الألوان صح.
53. بلاش تعمل تفاصيل كتير في الحوائط و الأرضيات و الديكورات عشان تعرف تفرش حضرتك.
54. أي حاجة مط بيبان عليها التراب.. لازم تبقى عارف ده كويس.
55. لو الأبواب الخشب شكلها حلو ادهنها أستر و لو شكلها مش حلو ادهنها لاكية مغسول.
56. القاعدة الذهبية في إختيار أكر و كوالين الأبواب ” الغالي رخيص”
57. القاعدة اللي فاتت دي برضه تنطبق على الخلاطات و الإكسسوار و النواكل.
58. الزجاج العاكس للشبابيك بيحجب 50% من الإضاءة.
59. الزجاج العاكس للشبابيك بيعكس الصبح بس مابيعكسش بالليل.
60. ألوان السجاد- ألوان الستاير- ألوان الفرش- ألوان الأبواب و الشبابيك- ألوان الموبيليا- ألوان دهانات الحوائط و الأسقف- ألوان الإكسسورات و الأنتيكات و التحف و الصور و البراويز… كل الحاجات دي ليها علاقة ببعض ولازم تنسقها صح عشان شقتك ماتبقاش ملعلطة.
61. حاول على قد ماتقدر تشتري كل لمبات الشقة لمبات ليد.. هتدفع مبلغ كبير بس هتوفره في فواتير الكهرباء.
62. لو هتجيب سخان كهرباء هات سعته كبيرة.
63. السخان الفوري مناسب بس في المطبخ لأنه بيستهلك كهرباء كتير.
64. في تأسيس الكهرباء ماتشتغلش غير بسلك السويدي الأصلي.
65. في تأسيس السباكة مواسير التغذية أكواثيرم أو باننجر و مواسير الصرف الشريف.
66. رخامة المطبخ هاتها جرانيت مش رخام.
67. الأحواض و القاعدة المعلقة بيدوا وسع للحمام و أسهل في النضافة.
68. إشتري الخلاطات و الصيني و النواكل للحمام و المطبخ قبل ما السباك يأسس.
69. لو بياض المحارة وحش و فيه مطبات أو شرخ حاول تعالجه قبل الدهانات.
70. لو بياض المحارة لسه فيه عيوب مش عارف تعالجها إستخدم معجون أسمنتي قبل الدهانات.
71. و انت بتقسم شقتك و بتفرشها إهتم براحتك و سعادتك أكتر من إهتمامك بالضيوف لأنك إنت اللي هتعيش في الشقة طول العمر مش الضيوف.
72. لو مش هتركب باب مصفح لباب الشقة يبقى يفضل تعمل باب حديد حماية.
73. ماتنساش تركب سلك لكل الشبابيك عشان الحشرات.
74. السلك الفايبر بيتقطع و السلك الصلب بيصدي.. هات سلك صلب و ادهنه عشان مايصديش.
75. لو عندك غرفة أطفال.. ادهنها لون يمشي أولادي أو بناتي.
76. قبل ماتفرش شقتك خد خطيبتك أو مراتك و روحوا أيكيا في التجمع الخامس مش هتشتروا منه حاجة بس هتطلعوا بأفكار حلوة جداً هتوفر عليكوا.
77. إهتم جداً بسقية السيراميك و يفضل تشتري مادة سقية جاهزة و إوعى تلون أسمنت السقية بأكسيد.
78. قفل حوالين البانيو و الحوض و القاعدة و عند جميع زوايا و أركان الحمام و المطبخ بمادة حقن فواصل من شركة سيكا.. صدقني هتعيش مبسوط بعدها.
79. بلاش تخلي سخان واحد يغذي الحمام و المطبخ مع بعض عشان كل ماتدخل تاخد دش مراتك هتفتح حنفية المطبخ و هتتلسوع.
80. البيبة في المطبخ حلوة عشان التنضيف و وحشة عشان الحشرات و الروائح و السدد.
81. الكرانيش الجاهزة (فيوتك) أفضل 100 مرة من الجبس البلدي.
82. بلاش أباجورة جنب السرير.. ركب 2 أبليك على الحيطة أجمل و أشيك.
83. إختار أماكن و مناسيب برايز الكهرباء بعناية عشان دي من أكتر الحاجات اللي هتضايقك لو ما اخترتهاش صح.
84. بالنسبة للموبيليا حاول تخلي كل الأدراج القريبة من الأرض ليها مفاتيح عشان الأطفال بيعشقوا الأدراج.
85. الغسالة في الحمام ولا في المطبخ.. في المطبخ ولا في الحمام.. إشتري دماغك و خلي مراتك اللي تقرر عشان تعيش في سلام.
86. خلي خطيبتك أو مراتك هي اللي تختار الألوان عشان فعلاً هما بيشوفوا ألوان الرجاله مابتشوفهاش.
87. الـ “ليلاه و البستاج و الفستاج و البيربل و البينك و الأوف وايت و الأون وايت و الأكسيديه و الجراي بيج” دي بعيد عنك درجات ألوان عن البنات أما بالنسبة للرجالة اسمها سمني و عسلي و بصلي و كموني و لموني و مشمشي و فسدقي و حمصي و برتقاني و أي حاجة ليها علاقة بالأكل.
88. ركب فلتر في المطبخ عشان مية الشرب في مصر غير صالحة للشرب.
89. لو الشقة اللي تحتك متشطبة أو ساكنة نبه على العمال اللي في شقتك مايخمروش مونه على الأرض عشان هتنشع على الشقة اللي تحت و جارك هيطلع يتخانق معاك.
90. لو الشقة اللي فوقك لسه ما اتشطبتش ابقى اتأكد إنه هيعزل الحمام و المطبخ و يختبر السباكة كويس.
91. إعزل الحمام و المطبخ عزل أسمنتي أسهل و أفضل و أرخص.
92. بلاش تمعجن الحوائط كلها و بعدين تركب السيراميك عشان ده من أسباب ظهور رطوبة بأسفل الحوائط.
93. ماتساش تركب منشر في مكان بيوصله شمس عشان مهم.
94. لو شقتك راكب فيها أبواب وحشة و مش معاك فلوس تغيرها ركبلها وشوش MDF .
95. لو الحمام بتاعك ضيق ماتركبش بانيو.. قفل كابينة شاور بيلت إن عملية و هتديلك مساحة واسعة.
96. الشركات المنتجة لمواسير السباكة المحترمة ممكن تيجي تعملك إختبار ضغط للمواسير و تديلك ضمان مدى الحياة ضد التسريب و عيوب الصناعة.. دي حاجة مهمة.
97. اعمل حسابك إن تكلفة تشطيب الشقة هتعدي ضعف الرقم اللي انت كنت عامل حسابك عليه.. دي قاعدة لم و لن تتغير.
98. لو عاوز تحسب تكلفة تشطيب شقتك قبل ماتبدأ بشكل تقريبي إضرب صافي مساحة الشقة في 1650 ج أو 2200 ج أو3300 دي هتطلعلك التكلفة بالتقريب حسب طبعاً إختياراتك و مستوى التشطيب اللي هتعمله.
99. لو جبت مهندس شاطر و محترم و أمين يشطبلك الشقة هتشتري دماغك و توفر وقت و فلوس.

  • اترك الملفات هنا او

مفيش حاجه إسمها متر التشطيب ب 1000 جنيه !!

by admin |نوفمبر 18, 2020 |0 Comments | التصميمات الداخلية

مفيش حاجه إسمها متر التشطيب ب 1000 جنيه !! 🤷‍♂️

لما بتيجي تشطب شقتك وتييجي تتفق مع شركة أو مهندس ويقولك متر التشطيب ب 1000 جنيه اعرف ان الكلام دة غير هندسي بالمره ؟

لأن ببساطه سعر المتر بيتوقف على حاجتين : طلبات العميل وسعر الخامات والاتنين متغيرين فازاي نحدد سعر ثابت للمتر ؟يعني لو الخامات غليت , هنعمل إيه ؟ 🤔 طب لو عميل طالب سيراميك زي لو طالب رخام ؟ اكيد التكلفة بتختلف

طب لو العميل غير مواصفات بند معين ي نصف الشغل او زود حاجه ؟ فين المقياس اللى نقدر نقيس بيه تكلفة الزياده ؟ او حتى النقصان

طب إيه الصح ؟ 💁‍♂️

الصح انه بيتعمل معاينه الأول للمكان وبيتعرف متطلبات العميل بالظبط (Style )ومواصفات البنود بالتفصيل وبيتم رفع مقاسات الشقه بالكامل (As Built)ورسمها

وبعد كدة بيتم تقديم مقايسه تفصيلية بالبنود المطلوبة وتكلفة المصنعيات ومتوسط تكلفة الخامات اللي بتزيد او تقل حسب اختيارات العميل , بحيث لو تم تغيير في مواصفات اي بند , نقدر نحدد تكلفة التغيير ده كام بالظبط من غير ما نظلم العميل ومن غير ما نغلط المهندس 😉

ولازم العميل يعرف إيه اللى هيتم في كل بند بالتفصيل عشان يكون عارف كل جنيه بيدفعه رايح فين

واكيد الخطوات السابقة مش مجانا ،،،

فمفيش حاجة اسمها متر التشطيبات ب 1000 جنيه ولا 1500 ولا 2000 جنيه فيه حاجة اسمها معاينة وطلبات العميل مكتوبة في مقايسة بتكلفة المصنعيات لوحدها ومتوسط الخامات لوحدها .

  • اترك الملفات هنا او

مراحل التأسيس الدهانات

by admin |نوفمبر 18, 2020 |0 Comments | التصميمات الداخلية

مراحل التأسيس الدهانات
1 ازاله الزيادات الاسمنتيه والجبسيه او اى بوارز على الحائط يعوق تنعيمه وسد المسام
2 تنفيض الحائط (بمقشه)او ماشابه للتخلص من الرملايه العاليه او الترابه
3 دهان اول وجه برايمر وافضل من جوتن (جوتاشيلد)او برايمر bva/
4 عمل اول طبقة معجون حسب اصول الصنعه (اونو شيلداكريلك900)
5 عمل تانى طبقه معجون حسب اصول الصنعه (اونو شيلداكريلك900)
6 سنفره خفيف ان وجد ودهان طبقة برايمر(فينوماستيك) اخرى ..
7 عمل ثالت طبقة معجون حسب اصول الصنعه( اكريلك900)..
8 سنفره جيدا + تلقيط مكان الختوش + سنفرة التلقيط.. ان وجد
9 دهان طبقه البطانه (برايمر فينوماسيتك_ديروسان من جوتن _7070glc ) لازم يتخف كويس علشان الحبايه ..
10 أو دهان طبقة بطانه (بويه عباره عن سنيتون وسنيتال )
نسب التشغيل 3/1 –وبتخفيف بنفط رومى بنسبة 15/20%
يراعى استخدام الاضائه وتكثيقها اثناء عمليه التأسيس لاظهار اى ديفو ..
يراعى ترك اى مكان للتشوين (تخمير المونه )حتى يجف تماما ..
يراعى اختبارالشروخ ومعالجتة مصدر الشرخ والطرق الامثل لحل المشكله ..
يوصى لعاملين السيراميك بعدم تشوين (وتخمير المونه جانب الحوائط) التخمير فى منتصف الغرف او الرسبشن
يوصى لاى عماله عدم استخدام المياه بطريقه مبالغ فيها جانب الطوب الاحمر ..
لانها بتعملناا مشكله اظهار الرطوبه بعد فتره لان الطوب بيبقى شرب ميه..
يوصى بتغليف الارضيات بعد الانتهاء مع اعمال السيراميك او الرخام (والوزر مهم جدا )..
يوصى بتغليف الالومينوم..
يوصى تغليف مفاتيح الكهربا والافياش ..
يوصى بتغليف الابواب او لزق البرور ان تم تشطيب الاسقف ..
التشطيب انصح بيوتن فينوماستيك مط..
وربع لامع لغرف الاطفال واماكن معامل الاحتكاك المرتفعه

  • اترك الملفات هنا او

25 سؤال لازم تسألهم لنفسك قبل ما تشطب شقتك 

by admin |نوفمبر 17, 2019 |0 Comments | التصميمات الداخلية

25 سؤال لازم تسألهم لنفسك قبل ما تشطب شقتك

1. ايه الحوائط اللى هتعدلها ؟ ايه الحوائط اللى هتبنيها ؟

2. قاعدة الحمام دفن ولا عاديه ؟

3. الحوض بركبة ولا بعامود ؟

4. الشطاف بارد بس ولا بارد سخن ؟

5. اماكن السخانات ؟ وهل هتركب سخان غاز ولا كهرباء ؟

6. هتعمل شاور ولا بانيو ؟ الغساله في الحمام ولا المطبخ ؟

7. لو بانيو هيكون عادي ولا بشاسيه ؟

8. هتفرش ازاي عشان توزيع الكهربا ؟

9. مكان التليفزيونات فين ؟

10. هتعمل كاميرات ولا لأ ولو اه هتعملها فين ؟

11. هتعمل جيبسم بورد ولا لأ , ولو هتعمل هيكون اماكنه فين عشان يأسسله كهربا ؟

12. لازم تكون عارف اماكن السبوتات وتوزيعها وتدي رسمة الانارة لصنايعي الجيبسم بورد عشان متلاقيش صاج وانتا بتركب السبوت !

13. عايز سيستم تليفونات داخلي ولا لأ ؟ عايز ساوند سيستم ؟

14. السيراميك هتجيبه بلاطات كبيره ولا صغيره ؟ لأن الكبير هتحتاج تمحر الحوائط ويتلزق , الصغير لأ

15. هتعمل ديكور في السيراميك معين ؟ لازم يتحدد من بدري عشان متلاقيش ان الديكور جاي في مكان علب الكهربا !

16. هتعمل اضاءه ليد مخفيه في السيراميك ؟

17. هتركب بورسلين ولا سيراميك ؟ لو بورسلين لازم تعرف انه لازم يتلزق مبيتعملش بمونه عشان بيفصل بعد كدة حتي لو الصنايعي حاول يجتهم د

18. هتعمل كل الدهانات بلاستيك ولا هتعمل ديكورات ؟

19. هتركب كرانيش ولا لأ ؟ ولو هتركبها هيكون فين اماكنها ؟

20. هتركب تجاليد حوائط بالحجر ؟ وأنهي حيطة بالظبط ؟

21. هتركب باب مصفح ولا باب عادي لباب الشقه ؟

22. هتركب الوميتال ولا PVC ؟

23. هتعمل على الألوميتال شيش حصير ولا لأ ؟ واوتوماتيك ولا مانيوال ؟

24. تقسيمة المطبخ وهل امريكي ولا عادي ؟ وهل هتعمله خشب ولا ألومنيوم ولا PVc ولا HPL ولا Polylac ؟

25.لازم تحدد اماكن التكييفات عشان ممكن تحتاج تدفن الفريون في الارضيه او الحائط ؟

النقاشة و الألوان للتصميمات الداخلية

by admin |نوفمبر 17, 2019 |0 Comments | التصميمات الداخلية

النقاشه دي نهايه الشغل والحاجه ال بنعيش معاها كل الوقت ولو في عيوب بتظهر اول حاجه بتستقبلها في الدهانات 

اولا :-

المواد :

مش بندقق كتير في المواد علشان الشركات كلها ليها اسم وموادها ممتازه

لكن لازم ندقق في نوع المعجون

طريقه العمل :-

الصنفره :

اذا كانت المحاره معموله تسطير زي ما ذكرت في موضوع المحاره سابقا

يبقي نصنفر بصنفره ورق عادي

واذا كانت المحاره ممسوسه او مكتمه

يبقي لازم الصنفره تكون بالحجر

—— لازم ندقق في الصنفره في الزوايه العاليه والسفلي لان معظم الصنيعيه مش بيركزو علي المناطق دي وأماكن التقاء الحوائط الزوايه العلويه والسفليه .

•بعد الصنفره لازم نغسل الجدران كويس بالخرطوم لضمان النظافه من التراب الناعم .

•ثم عمل السيلر العازل النهائي بين كل الاتربه والمعجون وال بيظهر عيوب الجدران للتعامل معاها هندسيا .

• لو ظهرت شروخ صغيره في المحاره نتيجه اي إهمال نقدر نفتح الشروخ ونحط معجون وتيب عرض ٨سم مخصص للنقاشه

•المعجون – ده من اهم مراحل الدهانات

لازم ندقق شويه هنا

# لازم ناخد ٣ وجوه معجون للجدران ازاي نعرف ان الصنيعي اخد ٣ وجوه وماضحكش علينا الوجه الاول بلون المعجون عادي

الوجه الثاني يلون المعجون اصفر خفيف

الوجه الثالث يكون بلون المعجون ابيض عادي .

• المهم بقي اننا بناخد الوجهين الاول والثاني ونقف لما يخلص السيراميك تركيبات ويخلص الالموتال تركيبات

وقبل مرحله التشطيب ناخد الوش الثالث وتصنفره كويس .

ملحوظه :-

اعمال الدهانات مستحيل تعالج اي عيوب في المحاره لان الدهانات لا تتجاوز ٢ ملم .

•بكون كده وصلنا لوجهين الفنش النهائي حسب اختيار العميل زيت بلاستيك قاطيفه الخ ……..

1-التأكد من نظافة الموقع كامل

2-استلام البرايمر ويتم تخفيفه بنسبة ٥٠٪؜ بالماء طبقا للمواصفات وبيانات المنتج .

3-استلام السكينة الاولي كفرد وتنعيم بعد الصنفرة لكامل الاجزاء.

4-استلام سكينة ثانية عمودية علي اتجاه السكينة الاولي “يفضل بلون مختلف “

بعد الصنفرة والتنعيم مع ملاحظة تنفيذ الحوائط بعد الاسقف.

5-استلام البطانة وتلقيط المناطق الخاسة او التي بها اثار سكينة المعجون “ريجة”

6-التأكد من تمام المعجنة لجميع الاماكن وخصوصا الزوايا والاركان والمناطق العالية بالحوائط

7-مراجعة نعومة السطح وعدم وجود زيادات في المعجون خصوصاً اعلي الوزرات.

ملحوظه قبل البداء في الدهانات

يجب حمايه مفاتيح الكهرباء والشبابيك والأبواب بلزق التيب

وفرش الأرضيات بلستيك شفاف او نشارة خشب ورمل

والأفضل عمل جبس كامل علي السيراميك لحين الانتهاء من الدهانات

وذالك حفاظا علي لمعه وجمال الأرضيات

8- استلام وجه اول دهانات باللون المطلوب والمنتج المعتمد.

9- استلام الوجه الثاني مع التأكد من تحرير الالوان باستخدام التيب

10- مراعاة توحيد ملمس الدهان لجميع حوائط الغرفة والتأكد من عدم وجود تسييل للدهانات

الصنياعي 

وطريقه التعامل معاه

هنفترض ان سعر المتر ٢٠ جنيه

يبقي حضرتك تعتبر سعر المتر ١٥ جنيه

وتقسم ال ١٥ علي ست مراحل وست دفعات كل مايخلص مرحله ياخد حقه

ولما تستلم شغلك نهائي بدون ملاحظات

تعمله الدفعه الاخيره ال هي عدد الامتار في ٥ جنيه اصل الاتفاق

× كلمنا على الواتس اب